KDA hte NDAK yang gaw, amyu ting a lawt lam hpe, shanhte a tinggyeng lu lawm lam a matu, galai sha kau sai hku re. KDA hte NDAK hpe woi awn taw nga ai ningbaw ni chye da ra ai gaw, 2000-2001 hta byin lai mat wa sai, sammung na Mung Sa La uhpung zawn tai na hpe myit yu ra na re.

KDA hte NDAK sha n'ga, daini amyu sha ni woi awn taw nga ai ningbaw ningla ni yawng hpe tsun shadum mayu ai. Dai gaw, nanhte asak kung wa sai hte maren lu da sai sutgan ni hpe nkam tat kau ai nga jang gaw, bungli kawn hkring mat yang kaja na re. Ngam nga ai ningbaw ni bai lahpa galai la na ra ai. Shara hkum pat taw nga mu.

KDA hte NDAK mung KIO/KIA kawn pru wa ai ni hkrai re. KIO/KIA hpe hpa majaw hpaw hpang wa ai kun? Amyu a matu shakut let, si mat wa sai share shagan ni gaw, majoi gaman lila sha rai sana kun? Anhte a shada da ai pandung de du sai kun?

Dai ni, myen hpyen wa hte mungmasa jahta sa wa ai shaloi, lahta na gasan ni hpe gaw, sung sung li li myit yu ra na ga ai.

Tinang tsap ai, mungmasa pandung, amyu sha ni lawt lu na matu policy sha jaw yang, ngang yang gaw, mungshawa gaw madi shadaw na sha re.